Женскиот фудбалски клуб САСА е на пат да го донесе првиот пехар на државен првак во М.Каменица

М.Каменица, 19.02.2020

Македонска Каменица, мал рударски град на истокот од државата, е на најдобар пат да добие државен првак во најпопуларниот спорт на светот, а тоа е фудбалот. Тој пат сосема успешно го изодува женскиот фудбалски клуб САСА, кој на крајот од полусезоната е на прво место во елитната женска фудбалска лига и има одлични шанси да го освои првото место, а со тоа и пехарот на крајот од сезоната.

Зоран Златковски
Зоран Златковски

Најголеми заслуги за ова му припаѓаат на Зоран Златковски, поранешен фудбалер, а денес претседател на клубот и негов тренер. Неговото искуство од фудбалските терени, знаењето и енергијата која ја поседува беа доволен предизвик во рударскиот град во месец јуни, 2017 година, да се формира женски фудбалски клуб.

-Идејата, всушност, дојде од јасно изразената воља на неколку девојчиња да формираме женски фудбалски клуб. На почетокот тргнавме со 26 фудбалерки за денес во сениорска, младинска и пионерска категорија да имаме 70 девојчиња од М.Каменица и од блиските градови кои се бават со овој убав спорт, вели Златковски.

Според тренерот тие и не помислувале дека само по три години ќе бидат прваци на Македонија во полусезоната, а со одлични шанси да го освојат пехарот на крајот од првенството.

-Девојките се силно посветени на фудбалот. Имаат во себе голема одговорност, ги извршуваат сите задачи на тренинг и за време на натпреварите. Тие се многу воспитани личности кои знаат која им е целта и силно се борат таа цел и да ја остварат, посочува Златковски.

За тренерот главна цел не е само да се биде прв туку преку спортот да се влијае на доброто воспитание на девојќите, да бидат личности со силен карактер што многу ќе им помогне во животот.

м-р Ана Димитровска
м-р Ана Димитровска

Ана Димитровска, која има магистрирано на Градежниот факулте при УКИМ во Скопје, е капитен на екпата. За девојќите има само пофални зборови.

-Со фудбалот се „заразив“ уште како дете во моето Делчево кога на отворени простори играв фудбал со мои машки врсници. Играв и во ЖФК Оризари со која екипа станавме државен првак. Сосема сум сигуран дека тој успех сега ќе го повториме и со ЖФК САСА, зашто имаме одличен тренер и исто такви тренинзи кои се разновидни и за нас дури и многу забавни. Ние сме едно големо семејство кое другарува, игра фудбал, тренира, се забавува. Македонска Каменица нека го очекува првиот државен првак и пехарот кој ние ќе го донесем, оптимист е Димитровска.

Клубот со 80 проценти го финансира рудникот САСА, кој и преку овој пример ја докажува својата голема општествена одговорност кон локалната заедница, а помош има и од Општина Македонска Каменица.