САШКО НИКОЛОВ: Штип ќе биде град во кој ќе растат и ќе сакаат да останат нашите деца

Штип, 22.11.2020

Изборната трка во Штип од ден во ден се засилува. Денес на прес конференција на отворено, пред штипскиот музеј, д-р Сашко Николов пред новинарите зборуваше за своите приоритети како иден градоначалник на Штип.

-Почитувани мои сограѓани, особено ми е драго што имам чест да сум кандидат за градоначалник на општина Штип, крстосница на источниот дел од државата,предложен од најодговорната, државотворна партија СДСМ. Мисијата, нашиот заеднички дом да го развиеме во модерен, европски, еколошки, безбеден град со еднакви можности за сите, ја започнавме пред 3 години. Сега, пред нас ја имаме шансата да продолжиме по зацртаниот, исправниот пат. Како иден градоначалник на општина Штип посветено ќе работам на развивање на секој дел од Штип и околината, на целосно решавање на клучните проблеми во градот и заеднички со вас, нашиот град ќе го направиме дом во кој сакаме да растат нашите деца, рече Николов.

Тој потенцира дека главниот фокус на неговата програма е инфраструктурата, а истовремено и обезбедување на еколошки здрава и чиста животна средина, грижа за сите граѓани подеднакво, подобри услови за учениците во училиштата, за најмалите во градинките, како и грижа за нашите највозразни сограѓани, пензионерите.

-Имаме визија, имаме цел и ќе ја оствариме. Забрзано ќе работиме драстично да ја намалиме разликата помеѓу градските и руралните средини во однос на инфраструктурата. Градиме по план и во наредниот период ќе продолжиме со реализација и на крупните проекти кои за Штип. Ќе следува реконструкција на крстосница во населбата Сењак, помеѓу улиците Сремски фронт и Борис Крајгер како и на улиците Панче Караѓозов, Солидарност, Браќа Даневи, Петти конгрес, дел од од Булеварот Партизанска со пари обезбедени од Министерство за транспорт и врски преку Светска банка. Заштитата на животната средина е проблем за кој штипјани бараат решение и тоа ќе го оствариме. За таа цел ќе се воведе нов режим на собирање на смет за што во функција се стават пет нови специјални возила за собирање смет. Ќе се реализира и проектот за селекција на отпад- пластика и стакло со поставување на контејнери на 30 нови локации. Како и останатите поголеми градови, така и Штип се бори со намалување на загадувањето на воздухот и се стреми да стане зелен град. Во таа насока ќе се постават мерни станици кои ќе го мерат квалитетот на амбиенталниот воздухот, ќе се формира нова паркова површина во населба Сењак 3 како и на паркови површини во с. Чардаклија и с.Караорман, елаборираше Николов.

Кандидатот на СДСМ за градоначалник на Штип порача дека еден долгогодишен сон на Штипјани станува реалност.Збор е за браната на реката Отиња.

Ве уверувам дека хипократовата заклетва не е мојот начин на работа само во докторската професија. Солидарноста, професионалноста и работа за сите граѓани подеднакво е мое мото, моја заклетва пред вас. Штип заслужува уште повеќе и уште подобро! 

-Обезбедени се средства од Влада на Република Северна Македонија за започнување на изградба на брана на река Отиња, проект од историска важност за Штип. Воведуваме гасификација во Штип. Она што е важно да се истакне е и дека завршени се идејниот и инфраструктурниот проект, во финална фаза е основниот проект. По завршување на постапката која ја води Владата, ќе се пристапи со изградба на 20 километри гасоводна цевка до Штип. Со цел безбедност на граѓаните и растеретување на сообраќајот и подобар проток, на левата страна од река Отиња ќе изградиме пешачки конзоли со средствата кои се веќе обезбедени од Буџетот на Република Северна Македонија и Буџетот на Општина Штип, кажа на пресот Сашко Николов.

Негов приоритет како градоначалник ќе биде и целосна посветеност на создавање квалитетни услови за живот и работа на сите наши граѓани, од најмладите до највозрасните.

-Ќе продолжиме со континуирано инвестирање и доопремување на училиштата и детските градинки. Престој на деца на самохрани родители во детските градинки е целосно бесплатен. Ќе се реновира клон градинката Пчелка, ќе се обезбедат соларни панели во сите клонови од детските градинки, а во тек е проект за изградба на детска градинка во рурална средина. Во наш фокус ќе бидат и реконструкции на училиштата за што е предвидена промена на кров во основното училиште Гоце Делчев и поставување термоизолациона фасада, како и промена на кров на гимназијата „Славчо Стојменски“. Почитувани штипјани, Сакаме Штип да биде град во којшто сакаме да растат и да останат да живеат нашите деца, нашите млади. Токму затоа сметам дека е исклучително важно да се дадеме себе си максимално во креирање средина која ги задоволува нивните потреби, го зајакнува нивниот дух, а од некои од нив создава и врвни спортисти. Затоа среќен сум што можам да најавам завршување на затворениот базен во СРЦ Суитлак како и на кошаркарското игралиште во СРЦ Суитлак. Изградба на нова трибина на градскиот стадион, како и воведување на нови спортски содржини под Исарот. Почитувани, Важно е Штип да избере градоначалник, легитимен со мандат од вас граѓаните. Штипјани заслужуваат реализација на проектите кои ги набројав сега, но и на нови кои се во нивен интерес. Јас ве уверувам дека хипократовата заклетва не е мојот начин на работа само во докторската професија. Солидарноста, професионалноста и работа за сите граѓани подеднакво е мое мото, моја заклетва пред вас. Штип заслужува уште повеќе и уште подобро!

На настанот присуствиваше и со свој говор пред медиумите се обрати и Љупчо Николовски, генерален секретар на СДСМ.