ШТИП: Министерот Бочварски задоволен од динамиката со која се гради браната на Отиња, вети пуштање на експресниот пат Штип-Кочани на есен
Штип, 02.06.2022
„Исклучително сум задоволен од динамиката со која се гради браната на реката Отиња во Општина Штип. Во моментов во делот на темелот се работи на левиот и десен брег, а паралелно со тоа ќе се работи на опточниот цевковод кој е со профил од f.1.700 и е долг 165 метри“. Ова го рече министерот за транспорт и врски Благој Бочварски при неговиот денешен увид во активностите на браната.
Бочварски уште еднаш потенцира дека овој проект финансиски целосно е поддржан од Владата преку Министерството за транспорт и врски.
-Вкупната инвестиција за изградба на браната е 306 милиони денари. Но, не е само браната проект на кој силно се посветени Владата и Минстерството за транспорт и врски, зашто и на терен убаво се гледа дека се реализираат бројни капитални објекти кои како проекти се финансирани од државниот буџет. Така, во Општина Штип, преку проект за поврзување на локални улици и патишта инвестираме во изградба на пет локални улици во градот со што значајно се подобрува сообраќајот и се зголемува безбедноста на граѓаните и учесниците во сообраќајот. Очекуваме до крајот на месецов да биде завршена и крстосницата во населбата Сењак, посочи Бочварски.
Министерот информира дека и работите на експресниот пат Штип-Кочани се одвиваат според зацртаната динамика и вети дека овој експресен пат ќе биде отворен за сообраќај оваа есен.
-Овој месец очекуваме да се започне со поставувањето на оградата на левиот брег од реката Отиња, а во тек е избор на компанија која оваа ограда ќе ја гради, а средствата ги обезбедува Министерството за транспорт и врски. Оградата ќе се поставува од управната зграда на ЈП Исар па се до вливот на реката Отиња во реката Брегалница, појасни министерот Бочварски.
Тој потенцираше дека годинава нашата држава е големо градилиште , дека целата расположива механизација е на терен низ целата држава, и дека тоа е резултат на фактот дека годинава имаме најголем буџет за изградба на патишта и за модернзација на патната инфраструктура.
