ШТИП. Кој денес манипулираше со група средношкoлци?

Штип, 03.03.2020

Група средношколци од други градови кои учат во штипски средни училишта денес напладне излегоа на протест пред Општина Штип. Со извици „Нема правда нема мир“ и „Сакаме превоз“, учениците, како што ни рекоа некои од нив , го изразувале својот револт од фактот дека Општина Штип им го укинала бесплатниот превоз кој досега редовно го имале.

Се работи за средношклци кои главно се од Кочани, Пробиштип, Свети Николе и Карбинци, а кои учат во Средното медицинско училиште, во Електромашинскиот училиштен центар и во Текстилното училиште.

Но, од Општина Штип излегоа со сосема поинакво видување на настанот. Велат дека превозот воопшто не е укинат, дека учениците и понатаму бесплатно ќе се превезуваат од родните места до Штип како град во кој одлучиле да се школуваат, но дека се работи само за промена на превозникот.

Имено, досега учиниците-средношколци имале превозник кој повеќе не ги исполнува условите за меѓуградски превоз. На ова ситуација стигнале поплаки од други превозници кои имаат уредни дозволи за ваков вид превоз, но реагирале и од Бирото за образование барајќи од Општина Штип да се избере законски превозник.

-Ние тоа го направивме, на јавен тендер избравме превозник кој ги исполнува законските услови, а учениците ниту останале ниту ќе останат без превоз. Во случајов сметам дека се работи за манипулација со нив. Ние на учениците им објаснивме за што се работи и сметам дека тие ја разбраа ситуацијата по што се повлекоа од протестот, рече Биљана Казанџиска, одговорна за образованието во Општина Штип.