ШТИП: Советот ги потврди носителите на признанието „8 Ноември“
Штип, 06.11.2020
Советот на Општина Штип на денешната седница која одеше онлајн, едногласно го усвои предлогот на Комисијата за доделување на признанието „8 Ноември“ за носителите на ова признание.
Сите советници, и од позиција и од опозиција беа едногласни дека Д-р Трајче Стојанов, професор по философија на Факултетот по образовани науки при Универзитетот „Гоце Делчев“ со своето педагошко и научно дело заслужува да го понесе највисокото признание на град Штип. Стојанов посебно ја одбележи тековната година со капиталното тритомно дело „Руска религиска философија“ кое на еден посебен начин беше промовирано во МАНУ. Покрај ова големо достигнување, професор Стојанов годинава се издвои и со изборот за почесен професор на Социјално педагошкиот институт во Москва, главниот град на Руската Федерација.
Добитничка на ова признание е и оперската пејачка Елена Голомеова, која со години настапува на оперските сцени во Франција, најмногу во Ница и Париз и која во сите свои многубројни интервјуа за француските медиуми не испушта гордо да назначи дека Штип е нејзиниот роден град со што придонесува за промоција на нашата заедница.
Инфективното одделение при Клиничката болница во Штип исто така е добитник на признанието „8 Ноември“ за 2020 година. Ова признание на инфективно му е дадено за напорната работа на докторите и сиот друг медицински персонал во време на пандемијата од Ковид 19. Вработените на ова одделение при Клиничката болница која е од регионален карактер ги вложија и ги вложуваат и последните атоми од своите сили за да им помогнат на бројните заболени од оваа зараза.
Територијалната противпожарна единица е четвртиот добитник на признието кое на штипските противпожарникари им е доделено по повод 100 годишнината од постоењето на оваа служба и за високите резултати остварени во борбата против огнената стихија, во спасувањето на животот и имотот на граѓаните и на заедницата.
Поради корона кризата признанијата на добитниците ќе им бидат врачени во недела, на 8 овој месец, во кабинетот на в.д. градоначалникот на Општина Штип Јане Миланов.
