Се рушат дискотеките во Градски парк, се подготвува теренот за новиот Луна парк

Градот Скопје започна со рушење на дискотеките во Градски парк. Градоначалникот Орце Ѓорѓиевски најави дека започнало расчистувањето на делот каде што ќе се гради новиот Луна парк, како и дека објектите кои што се отстрануваат биле дивоградби.

Во декември минатата година започна јавната набавка за избор на фирма за проектирање и монтажа на новиот Луна парк, кој треба да се гради на површина од 84.000 квадратни метри. Ќе треба да има ролеркостери, водени атракции, интерактивни игри, зони со виртуелна реалност и други атракции за урбана забава. Ѓорѓиевски вели дека посебно внимание ќе посветат на пристапноста, какои дека Луна паркот ќе биде комплетно прилагоден и за лицата со попреченост, со современи системи за безбедност, видео надзор и прва помош.

„Генерации деца беа лишени од место што им припаѓа, место за игра, радост и незаборавни моменти. На овој простор ќе има место каде семејствата ќе поминуваат квалитетно време заедно. Ќе има зони за одмор, улична уметност, локации за културни настани и театар со затворена сцена, панорамско тркало, пиратски брод, подморница, среќна лулашка и уште многу други реквизити“, најави Ѓорѓиевски.