Од денеска полицијата казнува со 45 евра – Возачите мора да ја имаат оваа опрема во автомобилите

Од денеска, недела, 15 ноември, во Македонија започнува законската обврска за задолжително поседување зимска опрема во возилата. Сите возачи кои учествуваат во сообраќајот на јавните патишта мора да ги исполнуваат пропишаните услови, во спротивно ризикуваат парична казна од 45 евра во денарска противвредност, односно околу 2.770 денари.

Обврската ќе важи до 15 март 2027 година и се однесува на возилата што учествуваат во сообраќајот, без разлика дали во моментот има снег, мраз или други зимски временски услови.

Од Републичкиот совет за безбедност на сообраќајот на патиштата (РСБСП) апелираат до возачите да ја проверат опремата и да ги приспособат возилата на зимските услови.

Не мора задолжително да имате зимски гуми

Според важечките прописи, за патничките возила со најголема дозволена маса до 3.500 килограми постојат две можности за исполнување на законската обврска.

Првата можност е автомобилот да има зимски пневматици на сите четири тркала, со минимална длабочина на шарата од четири милиметри.

Втората можност е користење летни пневматици со длабочина на шарата од најмалку четири милиметри, но во тој случај возачот мора да поседува и соодветни синџири за снег за погонските тркала.