Комбе удри во навивачи во Ливерпул – 45 повредени во напад кој полицијата не го смета за терористички

Вчера 53-годишен Британец со комбе удри во толпа навивачи на Ливерпул кои го славеа шампионскиот трофеј од Премиер лигата, повредувајќи повеќе од 45 луѓе и претворајќи ја радоста во страв и паника, објави Асошиејтед прес.

Полицијата соопшти дека возачот делувал сам и дека инцидентот не се третира како терористички напад.

Според Дејв Китчин од Брзата помош на Северозападна Англија, 27 лица се пренесени во болница, од кои двајца со сериозни повреди, а уште 20 се згрижени на самото место. Меѓу повредените има најмалку четири деца.

Четири лица, вклучително и едно дете, биле заглавени под возилото, а пожарникарите морале да го подигнат комбето за да ги ослободат.

„Овој настан фрли темна сенка врз денот кој требаше да биде празник за градот“, изјави Лиам Робинсон, претседател на Градскиот совет на Ливерпул.

Инцидентот се случил кон крајот на парадата, кога сиво комбе влетало во рутата на парадата удирајќи навивачи облечени во црвено со шалови и дресови на Ливерпул. Видеа на социјалните мрежи покажуваат како возилото удира човек кој летнува во воздух, пред да продолжи да гази луѓе по улицата.

Очевидецот Хари Рашид, кој бил со своето семејство, за АП рече: „Се слушна поп-поп-поп – луѓе кои беа удирани од хаубата. Потоа возачот само продолжи да гази, беше ужасно“.

Навивачите го опколиле возилото и почнале да ги кршат прозорците, но возачот повторно го стартувал моторот и продолжил да удира луѓе.

„Мојата ќерка почна да вреска. На земја имаше луѓе. Тоа беа навивачи, дојдени да прослават“, рече Рашид.

Илјадници луѓе се собраа на улиците на Ливерпул за да го одбележат 20-тиот шампионски трофеј на клубот во најпрестижното англиско фудбалско натпреварување.

Питер Џонс, кој допатувал од Ајл оф Мен, изјави дека слушнал силен удар и видел неколку повредени лица на земја. „Автомобилот пролета покрај нас, луѓето го бркаа, а задните стакла беа искршени“, рече тој.

Полицијата повика јавноста да не шпекулира и да не објавува вознемирувачки содржини. Осомничениот е идентификуван како белец – потег кој, според полицијата, има цел да спречи ширење дезинформации.

Минатото лето, сличен инцидент предизвика бран насилства откако азилант беше лажно обвинет за нападот иако сторителот бил роден во Обединетото Кралство.

Премиерот Киер Стармер ги осуди настаните како „страотни“ и ја пофали храброста на спасувачите. „Децата и сите граѓани заслужуваат да ги слават своите херои без вакви хорори“, рече тој.

Навивачите на Ливерпул беа лишени од прослава во 2020 година поради ковид-мерките, а клубот сега изрази сочувство до сите погодени. Слична порака испрати и Премиер лигата, осудувајќи ги „ужасните настани“.