Во Кочанско двојно зголемена потрошувачката на вода за шпиење, алармираат од општината

Кочани, 29.06.2026

Доцна синоќа Општина Кочани истапи со алармантно соопштение барајќи од медиумите веднаш да го пренесат до јавноста, Во соопштението се известуваат граѓаните дека во текот на вчерашниот ден е регистрирана енормно зголемена потрошувачка на вода во шест населени места (села) и тоа: Оризари, Грдовци, Горни Подлог, Долни Подлог, Тркање и Мојанци.

Во соопштението се вели:

-Додека вообичаената потрошувачка во општината изнесува околу 23 литри во секунда, во моментов е евидентирана потрошувачка од 53 литри во секунда, што претставува повеќе од двојно зголемување и сериозно го оптоварува водоснабдителниот систем. Причината е во масовното користење на водата за пиење за наводнување на тревници, бавчи и земјоделски култури, како и за миење на дворови, бекатон-површини и други површини.

-Поради ваквата несовесна и неодговорна потрошувачка, високите зони веќе се соочуваат со сериозен недостиг на вода, а доколку потрошувачката не се намали, ќе биде загрозено редовното водоснабдување и во останатите населени места, се алармира во соопштението.

Општина Кочани апелира до сите граѓани веднаш да престанат со користење на водата за наводнување и миење на дворови и други површини и истата да ја користат исклучиво рационално.

Доколку ваквата состојба продолжи, се најавува воведување рестрикции за несовесните корисници, со цел да се обезбеди уредно и непречено водоснабдување за сите граѓани во Општината.

-Апелираме до сите жители да покажат одговорност и солидарност, бидејќи само со рационално користење на водата може да се обезбеди стабилно водоснабдување во сите населени места, се нагласува во итното соопштение на Општина Кочани.