Извршителите лани наплатиле 137 милиони евра – најмногу од компании и граѓани

Во текот на 2025 година извршителите во Македонија преку присилна наплата реализирале повеќе од 137 милиони евра, покажуваат најновите податоци од извештајот за нивната работа. Вкупно биле наплатени 137.368.058 евра, што претставува реализација од околу 43,6 проценти од поднесените барања за извршување.

Иако износот на присилно наплатени средства е значителен, тој е за околу 23,3 милиони евра помал во споредба со 2024 година, кога наплатата била повисока. Сепак, податоците покажуваат дека товарот на наплатата сè повеќе паѓа врз граѓаните.

Најголем дел од средствата во 2025 година биле наплатени од компаниите, односно околу 63,4 милиони евра. Од граѓаните-должници присилно се наплатени 50,8 милиони евра, што претставува рекорден износ и првпат ја надминува границата од 50 милиони евра. Од државните институции биле наплатени околу 24,8 милиони евра.

Во споредба со претходната година, наплатата од граѓаните е зголемена за речиси четири милиони евра, додека кај компаниите и државата има намалување на износите што биле присилно наплатени.

Интересно е што компаниите не се само најголеми должници, туку и најголеми доверители, бидејќи преку извршители во текот на 2025 година успеале да наплатат повеќе од 105 милиони евра. Граѓаните, кога се во улога на доверители, наплатиле над 31 милион евра, додека државата инкасирала нешто помалку од 2,5 милиони евра по оваа основа.

Податоците покажуваат дека од воведувањето на системот на извршување до крајот на 2025 година преку извршители во Македонија се присилно наплатени повеќе од 2,22 милијарди евра од граѓани, компании и државни институции.

Овие бројки повторно ја отвораат дебатата за улогата на извршителите во наплатата на долговите, како и за потребата од подобра рамнотежа меѓу ефикасната наплата на побарувањата и заштитата на должниците.