KOЧАНИ: Новиот в.д. директор Иванов ќе го прави КЈП „Водовод“ европско претпријатие

Кочани, 01.12.2021

Кочанското јавно комунално претпријатие „Водовод“, очекувано, доби нов в.д. директор. Тоа е Иван Иванов  Иванов доаѓа на местото на досегашниот директор Андреј Киров. Во присуство на градоначалникот Љупчо Папазов денес беше извршено примопредавање на раководната позиција.

– Денес е прв ден од моето назначување за вршител на должност за раководител на КЈП „Водовод“ – Кочани. Денот ќе го искористам во запознавање, односно скенирање на состојбата на претпријатието, запознавање со вработените. Предизвикот да се биде на оваа функција е голем, одговорноста е уште поголема. Ќе го вложам целото мое знаење и умеење „Водовод“ да го направам европска фирма, а граѓаните на Општина Кочани ќе ги добиваат потребните услуги кои ќе ги испорачува ова претпријатие – истакна новоназначениот директор Иванов.

Според Андреј Киров, КЈП „Водовод“ го предава на новото раководство во одлична материјално-финансиска состојба.

– Од денес КЈП „Водовод“ има нов директор, јас сум внатрешно лице и останувам овде каде што ќе бидам од помош на новите лица и новата менаџерска структура во „Водовод“. Претпријатието има реализирано значајни инвестиции и очекувам и во иднина да продолжи така – соопшти Киров на предавањето на највисоката позиција во КЈП.