ДЕЛЧЕВО: Градот се разубавува со нови садници
Делчево, 21.03.2022
Екипи на ЈКП „Брегалница“ од денеска ја започна акцијата за засадување нови садници со што се збогатуваат зелените површини, а парковското зеленило ќе добие нов лик во градот.
Садниците ги набави Општина Делчево во тендерска постапка при што од Буџетот се одвоени од 336.890,00 денари со вклучен ДДВ. Економски оператор е „Градина цвет“ од с. Владиевци Василево, а набавени се 315 садници од сортите: Katalpa nana 60 садници, tuja smaragd occidentalis 125 садници, tuja smaragd spiral 55 садници, leylandii pom pom 75 садници.
Украсните садници се засадуваат по должината на парковското зеленило на бул „Македонија“ до излезот кон с. Ѕвегор.
Градоначалникот Горан Трајковски направи увид на почетокот на акцијата и истакна дека целта на оваа акција е да се збогатат содржините во јавните зелени површини во градот.
-Традиционално на денот на пролетта организираме акции за зголемување на зелените површини во градот и за засадување нови садници. И оваа година организираме таква акција и даваме свој придонес за зачувување на животната средина. Украсните садници кои се засадуваат ќе дадат посебен и богат изглед на булеварот кој е фреквентна сообраќајна артерија за транзит на возила за влез и излез од земјава, но секако ќе влијаат и на прочистување на амбиенталниот воздух и со тоа директно придонесуваме кон почиста животна средина. Заедно со претходно спроведените акции за засадување, парковското зеленило по должината на главната сообраќајница во Делчево, добива комплетно нов лик и една целина, истакна Трајковски.
Исто така, во Делчево ќе се засадат и 20 костени кои Општина Делчево ги доби по пат на донација од „Фарма-органика“-расадник од Прилеп, кои ќе се засадуваат по должината на ул „Кеј на ослободување“ на потегот до градскиот стадион.
-Изразуваме благодарност до „Фарма-органика“ за донираните садници кои ќе ја разубават ул „Кеј на ослободување“и градскиот парк, а наредниот период ќе се уредува и површината на кејот на река Брегалница до пешачкиот мост, каде се планира засадување врби и липи, истакна Трајковски.
