Претставнички на дипломатскиот кор и на Владата на Македонија во посета на Малешевијата
Берово, 07.10.2023
На покана на министерката за животна средина и просторно планирање Каја Шукова претставнички на дипломатскиот кор во нашата држава и претставнички на Владата на Република Северна Македонија вчера беа во посета на новопрогласеното заштитено подрачје Малешево.
Женската тура, стартуваше со посета на Едукативниот центар за зачувување на природата во село Негрево, кoj од стара училишна зграда со поддршка на Програмата за зачувување на природата е трансформиран во модерен објект со палета на интерактивни едукативни активности чија цел е зачувување на природата во Брегалничкиот регион преку едукација и подигање на јавната свест и промоција на одржливо користење на природните ресурси.
„Едукативниот центар ќе им помогне пред се на нашите деца да разберат колку природата е важна и колку животната средина е поврзана со другите економски сектори“, истакна министерката Шукова од Негрево порачувајќи дека сакаме нашата држава да ја видиме економски развиена, но паралено со зачувана животна средина и зачувани природни вредности со кои изобилуваме.
„Швајцарија беше ангажирана повеќе од 10 години за заштита на животната средина, обезбедувајќи локален одржлив економски развој и промоција на агротуризмот. Најголемите достигнувања во заштитено подрачје Малешево беа постигнати поради силното партнерство меѓу Министерството, за животна средина и просторно планирање, координаторот Фармахем, Македонското еколошко друштво, локалните институции и населението, создавајќи заедничка подготвеност за промени“ истакна амбасадорката на Швајцарија Вероник Улман, поздравувајќи ја иницијатива на министерката Шукова.
На самата локација беа претставени локалните производители со нивните традиционални производи по кои е препознатлив крајот со што се отвараат нови можности за социо-економски рзвој на локалните заедници.
Настанот е организиран во соработка на МЖСПП и Швајцарската програма за зачувување на природата, во која главен координатор е Фармахем, а партнер спроведувач Македонското еколошко друштво.
Во рамките на настанот, учесничките имаа прилика да ги посетат и да уживаат во убавините на водопадите Црн Дол, по што го посетија истоимениот излетнички простор уреден за безбеден традиционален пикник што нема да предизвика деградација на природата.
Поддршка со свои производи дадоа и ЈП „Национални шуми“, подружница Пехчево, винаријата „Тиквеш“ и „Скопска пивара“, а тимот на ФЈ-кулинарски консултанти обезбедија вистинско гурманско доживување со локални намирници.
