Од недела полицијата ќе казнува со 45 евра: Возачите мора да ја имаат оваа опрема во автомобилите

Од недела, 15 ноември, во Македонија започнува законската обврска за задолжително поседување зимска опрема во возилата. Возачите кои нема да ги исполнуваат пропишаните услови ризикуваат парична казна од 45 евра во денарска противвредност, односно околу 2.770 денари.

Обврската ќе важи до 15 март 2027 година и се однесува на сите возила што учествуваат во сообраќајот на јавните патишта, без разлика дали во моментот има снег или зимски временски услови.

Републичкиот совет за безбедност на сообраќајот на патиштата (РСБСП) ги повикува граѓаните навреме да ги подготват своите автомобили, предупредувајќи дека снегот, мразот, влажните коловози и намалената видливост значително го зголемуваат ризикот од сообраќајни незгоди.

Не мора задолжително да имате зимски гуми

Според важечките прописи, за патничките возила со најголема дозволена маса до 3.500 килограми постојат две можности за исполнување на законската обврска.

Првата е користење зимски пневматици на сите четири тркала, со минимална длабочина на шарата од четири милиметри.

Втората можност е автомобилот да има летни пневматици со длабочина на шарата од најмалку четири милиметри, но во тој случај возачот мора да поседува и соодветни синџири за снег за погонските тркала.