КОЧАНИ: Илијев оддаде признание на експедицијата која се искачи на Арарат

Кочани, 14.08.2020

Дел од експедицијата на Планинарскиот спортски клуб „Осогово“, којашто минатата седмица се искачи на врвот Арарат во Република Турција, денеска беше примена од градоначалникот на Општина Кочани Николчо Илијев.

– Ви честитам за постигнатиот успех, за храброста и физичката и психичката кондиција да освоите уште еден врв, и тоа во време на пандемија. Продолжете со  резултатите, вие сте вистински амбасадори на Кочани – истакна Илијев доделувајќи им признание на планинарите.

За искачувањето до врвот и симнувањето оттаму, на планинарите Тошо Антов, Гоце Серафимов, Зоран Николов, Дејан Христов и Рено Рисковски од ПСК „Осогово“ им биле потребни пет дена.

– Планината Арарат и нејзиниот највисок врв не се лесно достапни, поради што имавме базни кампови на 3 200 и на 4 200 метри каде се прилагодувавме на висинската разлика. Кислородот во воздухот на врвот Голем Арарат е само 11 %, што доволно илустрира за колку напорна активност станува збор и каква е потребната психофизичка подготвеност. Сепак, успеавме сите петмина да се искачиме и да го развиориме македонското знаме, истакна Гоце Серафимов, член на експедицијата на планинарскиот клуб „Осогово“.

ПСК „Осогово“ е единствениот клуб од Македонија кој во изминатиот период организираше ваков планинарски потфат. И покрај состојбата со коронавирусот и отежнатото патување во странство, за почетокот на септември кочанските планинари најавија искачување на Езерски Врв на планината Проклетие, на границата меѓу Албанија и Црна Гора.