Бајден додели 18 претседателски медали на слободата и испорача јасна порака
Со 16 дена што му остануваат од политичката кариера која траеше половина век, претседателот на САД Џо Бајден додели 18 највисоки признанија на клучни членови од политиката, бизнис секторот и славните личности.
При доделување на претседателските медали на слободата, Бајден испрати јасна порака дека е незадоволен од реизборот на Доналд Трамп за нов претседател на САД.
„Да се сеќаваме, нашиот напор ќе продолжи, и за да продолжиме, како што би рекла мојата мајка, треба да ја чуваме верата,“ изјави Бајден во Белата куќа на крајот од церемонијата.
Меѓу оние што ја примија наградата беа Хилари Клинтон, поранешната прва дама, сенатор и државна секретарка, на која Трамп ѝ се закани со затвор; Роберт Ф. Кенеди, и Џорџ Ромни, покојниот татко на поранешниот сенатор Мит Ромни, републиканец од Јута кој повеќепати ги отфрли акциите и филозофијата на Трамп.
Како многу претседатели порано, така и Бајден додели медали на најплодните прибирачи на средства на неговата партија, вклучувајќи го човекот кој е најголем меѓу донаторите на Демократската партија — Џорџ Сорос.
Бајден исто така даде признание на уметниците, музичарите, спортистите, филантропите и другите кои придонеле за општеството, вклучувајќи го пејачот Боно; актерот Мајкл Џ. Фокс; кошаркарската легенда Ервин „Меџик“ Џонсон, и инвеститорот Давид М. Рубенштајн.
19-тиот човек кој беше избран да ја прими наградата — фудбалската мегазвезда Лионел Меси — не присуствуваше на церемонијата ниту испрати претставник да ја прими наградата во негово име поради конфликт на распоредот, според Белата куќа.
„Како културни икони, достоинствени државници, хуманитарци, рок ѕвезди, спортисти, вие ги храните гладните, им давате надеж на оние кои страдаат и ги обликувате знаците и звуците на нашите движења и нашите спомени,“ рече Бајден.
По победата на Трамп во 2016 година, претседателот Барак Обама ја даде медалјата на НБА ѕвездата Мајкл Џордан, актерите Том Хенкс и Роберт Де Ниро и други. Претходно, г. Обама ја додели наградата на г. Бајден, кој бил негов потпретседател.
Четири години подоцна, кога Трамп ja напушташе белата куќа, тој ја даде медалјата на два професионални голфери, еден олимписки спортист и пратениците Девин Нунес од Калифорнија и Џим Џордан од Охајо, двајца од неговите најжестоки републикански лојалисти во Конгресот.
