Ирскиот јавен радиодифузен сервис и други ирски медиму се евакуирани поради закани со бомби

Голем број познати ирски медиумски организации, вклучувајќи го и ирскиот јавен радиодифузен сервис RTÉ, беа евакуирани откако беа упатени закани кон нив, пренесува Би-Би-Си.

Радио водител на RTÉ им кажа на слушателите дека организацијата добила предупредување преку е-пошта дека „бомба ќе експлодира во рок од 45 минути“.

Вработените во весникот Irish Independent и канцелариите на радиостаниците NewstalkFM и TodayFM во Даблин, исто така, беа советувани да ги напуштат своите згради.

Во соопштението, гардаи (ирската полиција) изјави дека се „свесни за заканата упатена кон медиумските организации тука и во Европа“.

Тие додадоа дека се во контакт со засегнатите ирски медиумски организации и дека заканите ќе бидат истражени.

Таоизеахот (ирскиот премиер) Михаел Мартин ја опиша ситуацијата како „загрижувачка“ и додаде дека прв приоритет на неговата влада е безбедноста на ирската јавност.

„Вчера, се чини дека имаше координирани напори за нарушување на воздушниот сообраќај“, рече тој.

Тој се осврна на лажни закани со бомби кои влијаеја на 21 лет низ Европа во четврток, вклучувајќи ги и авионите на Ryanair и Aer Lingus.

Мартин изјави за RTÉ дека сè уште не е познато дали заканите доаѓаат од поединци или станува збор за „координиран напад“, но рече дека се сфаќаат сериозно.

„Гардијата, одбранбените сили, сајбер и воздухопловните власти работат на утврдување кој стои зад ова, како и нивните европски колеги“, рече Мартин.

Тој додаде: „Тоа само илустрира колку релативно едноставно може да биде да се предизвика нарушување и да се поткопа нормалното функционирање на општеството преку неконвенционални активности од ваков вид, кои се дизајнирани да предизвикаат нарушување, дизајнирани да предизвикаат страв и вознемиреност“.

Танаист (вицепремиер) Сајмон Харис рече дека станува збор за „многу сериозна и еволуирачка ситуација“.

„Очигледно ова доаѓа по голем број закани за бомби вчера и во последните денови во врска со авиокомпаниите“, изјави тој за Cork 96FM.

„Мислам дека е фер да се каже дека сè уште не знаеме кој е одговорен за она што се случува утрово“.

Тој рече дека ирските власти и сајбер експертите ќе „соработуваат соодветно со европските колеги“ за да ги идентификуваат виновниците.

Десетици вработени во RTÉ се собраа пред седиштето на радиодифузерот во Донибрук претходно, додека гардата вршеше претреси со кучиња трагачи.

Некои радио емисии во живо беа прекинати бидејќи радиодифузерот се префрли на претходно снимени програми за време на евакуацијата, но RTÉ Radio 1 останува во етер бидејќи емитува од возило на водителот.