Уапсени петмина мажи кои планирале напад на воздухопловна база во Велика Британија

Британската полиција уапси петмина мажи под сомнение за кривични дела поврзани со експлозиви и тероризам, во близина на воздухопловна база што САД ја користеле за напади врз Иран, откако добиле дојава дека три комбиња се упатиле кон воениот аеродром.
Американскиот претседател Доналд Трамп изјави дека осомничените планирале да нанесат голема штета и дека биле под истрага на британските и американските власти.
Британските детективи за борба против тероризмот, кои ја водат истрагата, соопштија дека полицијата добила повик за три сомнителни возила кои во раните утрински часови во неделата се движеле кон базата на Кралските воздухопловни сили РАФ во Ферфорд, во западна Англија.
Петмината мажи беа уапсени од вооружени полицајци и подоцна задржани во притвор под сомнение за подготовка на терористички чин. Полицијата, која изјави дека смета оти ситуацијата е ставена под контрола, сè уште јавно не соопшти кој, според нивните проценки, бил вмешан во случајот.
Како најверојатен се разгледува мотив поврзан со Иран, изјави извор запознаен со истрагата, додека се испитуваат и можностите за руска саботажа или заговор од исламистички групи.
„Се наоѓаме во почетна фаза на истрагата, а петмината мажи остануваат во притвор“, изјави во соопштение Вики Еванс, виш национален координатор за полициски активности против тероризмот.
„Како што може да се очекува, тесно соработуваме со нашите партнери за да ги разбереме околностите на инцидентот.“
Полицијата соопшти дека околу базата е поставен безбедносен кордон во радиус од 400 метри, додека тимот за деактивирање експлозивни направи ги прегледуваше комбињата. Жителите на 85 домаќинства во блиското село беа евакуирани, а вооружени полицајци патролираа на локацијата.
Британската влада – која им даде дозвола на САД да ги користат бомбардерите стационирани во Ферфорд за напади врз иранските ракетни позиции што гаѓаа бродови во Ормускиот теснец – соопшти дека премиерот Енди Бурнам редовно се информира за развојот на настаните.
Бурнам им се заблагодари на полицијата и на вооружените сили, наведувајќи на платформата X: „Знам дека денешниот инцидент во близина на базата Ферфорд ќе предизвика голема загриженост кај локалните жители и кај многу луѓе што ги следат случувањата низ земјата“. Во јули, Британија соопшти дека нејзините вооружени сили се подготвени да ја заштитат земјата од каков било напад, откако Иранската револуционарна гарда предупреди да не се дозволи американски бомбардери да полетуваат од Ферфорд, наведувајќи дека секоја база што би се користела за изведување напади ќе биде легитимна цел.
„Апсењето во Обединетото Кралство беше фантастично“, им рече Трамп на новинарите, оценувајќи ја акцијата како „неверојатна работа“.
„Ги држевме под истрага. Имаа намера да нанесат голема штета на нашата база, а соработката со Британците се одвиваше одлично. Долго време ги следевме и на крајот ги фативме“, додаде Трамп.
Во неделата наутро, базата беше блокирана од вооружена полиција, а пристапот беше попречен и со тешка механизација. Сведоци за Ројтерс изјавија дека безбедноста е зголемена и во другите бази што ги користат САД, при што на влезовите на базите на Кралските воздухопловни сили  во Лејкенхит и Милденхол во источна Англија беа забележани оклопни возила и војници.
Една локална земјоделка изјави за весникот „Дејли телеграф“ дека ја известила полицијата откако забележала комбиња и мажи кои се однесувале сомнително додека се враќала дома од забава.
„Видов група млади момчиња со изглед карактеристичен за Блискиот Исток како бегаат низ дрвјата. Некои од нив носеа маски или фантомки и сите се разбегаа пред нас додека поминувавме со возилото“, изјавила таа за весникот.
„Некои од нив истрчаа во полињата, а други се свртеа и почнаа да трчаат кон воздухопловната база. Мислам, не е можно да видите маскирани мажи како трчаат наоколу во еден и пол по полноќ во рурална област, во близина на обезбедувана воздухопловна база, а притоа да не почувствувате загриженост.“
Локалниот советник Тристан Вилкинсон изјави за Ројтерс дека неодамна имало безбедносно предупредување поврзано со Ферфорд и дека надзорот бил засилен.
„Значи, пред околу шест недели постоеше конкретна закана од Иранците упатена кон оваа база. Во тоа време, во областа имаше засилен надзор“, рече тој.
Портпарол на Американските воздухопловни сили одби да зборува за конкретни мерки за заштита на силите во базата.
„501-то крило за борбена поддршка и нашите колеги од другите крила стационирани во Обединетото Кралство остануваат будни и ќе преземат соодветни чекори за да ја гарантираат безбедноста и сигурноста на припадниците на американските сили, цивилите, договорните соработници и нивните семејства“, изјави портпаролот.
Британските министри претходно исто така ги информираа субјектите што управуваат со критичната инфраструктура за заканата што ја претставува Русија, при што владата изразува зголемена загриженост поради можни саботажи и сајбер-напади.
Русија негира дека спроведува хибридни напади врз западните земји.