„Стихот како поддршка, стихот како сведок“ – хуманитарно поетско читање во Културно информативен центар, Скопје

На 10 ноември во Културно информативниот центар ќе се одржи хуманитарното поетско читање „Стихот како поддршка, стихот како сведок“, настан посветен на поезијата, солидарноста и потребата да се подаде рака таму каде што е најпотребно преку културата и уметноста.

На настанот ќе настапат девет скопски поетеси и поети: Филипа Сара Попова, Ана Тодоровска, Ангела Бошкоска, Софија Тодороска, Ивана Јовановска, Марија Велинова, Андреј Медиќ Лазаревски, Викторија Ангеловска и Јулијана Величковска. Преку своите стихови, тие ќе ја споделат поезијата со публиката, но и ќе дадат свој придонес кон една конкретна хуманитарна иницијатива – помош за социјално загрозени семејства од Скопје.

Посетителите ќе имаат можност да разгледаат и да купат книги од авторите што ќе настапат, на штандовите на ПНВ Публикации и Култура Бета. Средствата од продажбата на книгите ќе бидат дополнителен придонес во хуманитарната акција.

Настанот е потсетување дека поезијата и книжевното творештво не секогаш треба да остане само во книгите. Туку, таа може да биде автентичен глас на времето во кое живееме и начин да се препознаеме едни со други, како и поттик за солидарност, хуманост и поддршка.

Затоа, сите љубители на поезијата и хуманитарци, но и сите што веруваат во моќта на заедништвото и солидарноста, повелете на една вечер во која стиховите ќе имаат и уметничка и хуманитарна вредност.

Затоа што стихот може да биде сведок на времето, но може да биде и поддршка за оние на кои таа им е најпотребна.

Платформа преку која ќе се подмират сметките на социјално загрозени семејства: https://ways2help.us/payBill (итни и приоритетни)