Трамп очекува да се постигне договор за крај на војната пред преговорите меѓу Украина и Русија во Абу Даби

Американскиот претседател Доналд Трамп изјави дека во четвртокот остварил приватна средба со пратеникот на рускиот претседател Владимир Путин, Кирил Дмитриев откако рускиот претставник се појави заедно со претставници од Украина на настан во Белата куќа, организиран од првата дама на САД, Меланија Трамп.
Трамп не откри за што разговарал со пратеникот на Путин, Дмитриев, но предвиде дека наскоро би можело да дојде до договор насочен кон решавање на руската војна во Украина.
Предвидено е американска делегација да посредува во разговорите меѓу претставниците на Русија и Украина, кои ќе се одржат во Абу Даби на 10 и 11 ноември.
Обраќајќи им се на новинарите во Белата куќа, Трамп изјави дека војната е блиску до разрешница и дека нејзиното завршување би можело да ја опфати цела Европа.
„Тоа ќе биде голем договор и ќе опфати повеќе од само Украина… Би можел дури да кажам дека може да ја опфати цела Европа. Тоа ќе биде голем, прекрасен договор и сите ќе бидат воодушевени“, рече Трамп.
Трамп честопати предвидуваше дека е блиску постигнување договор за ставање крај на најсмртоносниот конфликт во Европа по Втората светска војна. Сепак, во последните недели преговорите добија на интензитет.
Трамп изјави дека во четвртокот не се сретнал со украинската делегација.
Пратеникот на Трамп, Џаред Кушнер, соопшти дека американските претставници, кои во четвртокот се сретнаа во Брисел, воделе продуктивни и суштински разговори со Украина, НАТО и европските партнери во врска со безбедносните гаранции за Украина и пошироката европска безбедносна архитектура.
Во објава на социјалните мрежи, Кушнер наведе дека преговарачите разгледуваат пет главни цели: постојани безбедносни консултации, сигурна комуникација во кризни ситуации, поголема воена транспарентност, реципрочни мерки за намалување на ризиците од ескалација, како и трајна рамка за долгорочна европска безбедност и стабилност.
„Сите договори мора целосно да го почитуваат суверенитетот, територијалниот интегритет и независното одлучување на секоја нација“, рече Кушнер. „Секоја земја ќе го задржи авторитетот над сопствената безбедност и сојузи, и ниту една земја нема да има право на вето врз суверените одлуки на друга земја.“
„НАТО ќе остане централен столб на европската колективна одбрана, а оваа иницијатива ќе се надоврзе на постојните институции и обврски.“
Дмитриев беше меѓу официјалните претставници присутни на реткиот директен состанок со украински претставници во Белата куќа, организиран по повод шестдневното примирје во градот Олешки – кој е под руска контрола – а за чие постигнување помогна Меланија Трамп. Договорот истече во неделата.
„Ја избравме хуманоста пред војната“, изјави првата дама на настанот. „Мораме да ја искористиме храброста што ја покажавме во Олешки за да најдеме заеднички јазик, водени од заедничката грижа за страдањето на невините луѓе.“