Индија и Пакистан меѓусебно се обвинуваат за напади
Индија и Пакистан се обвинија меѓусебно за започнување нови воени напади денес, користејќи беспилотни летала и артилерија трет ден во најжестоките борби меѓу нуклеарно вооружените јужноазиски соседи во последните речиси три децении.
Ова се случува откако Индија во средата нападна повеќе локации во Пакистан за кои рече дека биле „терористички кампови“, како одмазда за смртоносниот напад врз туристи во индиски Кашмир минатиот месец, пишува Ројтерс.
Пакистан негираше вмешаност во нападот, но двете земји разменија прекуграничен оган, гранатирање и испратија беспилотни летала и ракети во воздушниот простор на другата земја оттогаш, при што околу четириесетина луѓе загинаа.
Ова се најсмртоносните борби од ограничениот конфликт меѓу двете земји во регионот Каргил во Кашмир во 1999 година. Исто така, првпат од нивната војна во 1971 година, Индија напаѓа пакистански градови надвор од областа Кашмир.
Имено, кризата во Кашмир датира од 1947 година, кога Велика Британија се повлече од регионот без да го реши статусот на областите таму, а Индија и Пакистан станаа независни по повлекувањето на британската колонијална власт.
Во 1947 година, Пакистан и Индија влегоа во првата војна за Кашмир. Поради истата причина, двете земји повторно влегоа во војна во 1965 и 1999 година. Индија контролира околу 45 отсто од Кашмир, Пакистан околу 35 отсто, а Кина 20 отсто.
