Руски офицер загина во експлозија на автомобил во Москва пред посетата на претставникот на Трамп

Висок руски воен функционер е убиен во експлозија на автомобил во близина на Москва, само неколку часа пред средбата во Кремљ меѓу Владимир Путин и специјалниот пратеник на Доналд Трамп, Стив Виткоф, пренесе „Гардијан“.

Станува збор за офицерот Јарослав Москалик, заменик-шеф на главниот оперативен директорат на Генералштабот на руските вооружени сили.

Експлозијата, како што пренесува медиумот, е слична по природа на претходните напади врз Русите за кои подоцна одговорноста ја презеде Украина и може да фрли сенка на преговорите меѓу Москва и Вашингтон.

Рускиот истражен комитет соопшти дека експлозијата е предизвикана од активирање на импровизирана експлозивна направа полна со шрапнели. Комитетот, кој ги истражува големите злосторства, рече дека отворил кривично дело. Според информациите, бомба во паркиран автомобил во Балашиха, во московскиот регион, била активирана од далечина кога воениот офицер поминал покрај него.

Киев сè уште не го коментира инцидентот.