Украина го затвори вентилот за рускиот гас кон ЕУ

Испораката на руски гас за земјите од ЕУ преку Украина заврши, откако истече петгодишниот договор меѓу украинскиот оператор за транзит на гас Нафтогас и рускиот Гаспром. Украинскиот претседател Володимир Зеленски изјави претходно дека неговата земја нема да дозволи Русија „да заработи дополнителни милијарди од нашата крв“ и и даде на ЕУ една година да се подготви.

„Го запревме транзитот на руски гас. Ова е историски настан. Русија ги губи своите пазари, а Европа веќе донесе одлука да се откаже од рускиот гас“, изјави министерот за енергетика на Украина, Герман Галушченко.

Европската комисија соопшти дека гасниот систем на континентот е отпорен и флексибилен и дека има доволно капацитет да се справи со крајот на транзитот преку Украина. Русија сè уште може да испрати гас за Унгарија, како и за Турција и Србија, преку гасоводот Турски тек преку Црното Море.

Запирањето на протокот низ Украина го означува крајот на ерата на евтин руски гас во ЕУ. Словачка е најпогодена, додека Европската комисија вели дека влијанието ќе биде ограничено, благодарение на внимателното планирање и алтернативните набавки. Русија изгуби важен пазар, но нејзиниот претседател Владимир Путин вели дека земјите од ЕУ најмногу ќе страдаат.

ЕУ значително го намали увозот на гас од Русија откако ја започна својата целосна инвазија на Украина во 2022 година, но голем број источни земји-членки сè уште зависат во голема мера од испораките, што ја прави Русија побогата за околу 5 милијарди евра за една година. Според ЕУ, рускиот гас учествуваше со помалку од 10 отсто од увозот на гас во 2023 година, а таа бројка во 2021 година беше 40 отсто.