Украина објави дека заробила севернокорејци што се борат за Русија

Двајца ранети севернокорејски војници се заробени како воени заробеници од украинските војници во руската Курска област, изјави денеска претседателот Володимир Зеленски. Двајцата мажи добиле неопходна медицинска помош и се во притвор на Службата за безбедност на Украина (СБУ) во Киев.

Претседателот рече дека им е благодарен на украинските падобранци и војниците од силите за специјални операции за заробувањето на севернокорејците. Тој додаде дека тоа не е лесна задача, тврдејќи дека руските и севернокорејските војници обично егзекутираат ранети Севернокорејци за да се избришат сите докази за вмешаноста на Северна Кореја во војната против Украина.

Во изјавата објавена на Телеграм и X, Зеленски рече дека војниците разговараат со истражители и дека и наложил на Службата за безбедност на Украина да им дозволи на новинарите пристап до нив.

„Светот треба да ја знае вистината за тоа што се случува“, додаде тој.

Зеленски, исто така, објави фотографии од двајца ранети мажи, но не обезбеди докази дека тие се Севернокорејци. Некои извештаи велат дека Русија ги крие севернокорејските борци давајќи им лажни лични карти.

Во декември, јужнокорејската разузнавачка агенција објави дека севернокорејскиот војник за кој се верува дека бил првиот заробен додека ја поддржувал руската војна во Украина, починал откако бил земен жив од украинските сили. Белата куќа, пак, соопшти дека севернокорејските сили доживуваат масовни загуби на фронтот.