Jaс, Итар Пејо, нов фестивал на хуморот и сатирата во Битола
Битола, 14.02.2017
Денес на Меѓународниот Славјански универзитет„Гаврило Романович Державин“ во Битола беше распишан конкурсот за првиот интернационален фестивал на сатирата, хуморот и карикатурата – “Јас, Итар Пејо- 2017“
Како дел од програмата беше отворена изложба со 50 карикатури по повод 50 години творештво на истакнатиот македонски карикатурист Јордан поп Илиев, а настапија и истакнати афористичари, хумористи, сатиричари и карикатуристи.
За идејата за покренување на ваков фестивал зборуваше писателот, Проф-д-р Христо Петрески, директор на Институтот за култура при МСУ, а беседа за Итар Пејо одржа Проф. д-р Васил Тоциновски. За историјатот на хуморот и сатирата во Источна Македонија говореше новинарот Иван Бојаџиски, за улогата и мисијата на сатирата, хуморот и карикатурата во светот беседеше пистаелот м-р Трајче Кацаров, омаж за познатиот сатиричар Софе Штерјовски имаше афористичарот Миле Ѓоргијоски.
Инаку, идејата за овој фестивал дојде од Проф.д-р Јордан Ѓорчев, директор на МСУ, писател и карикатурист кој од МСУ Свети Николе-Битола создаде култна културна точка во Република Македониа.
Конкурсот за учество на Првиот фестивал на хуморот, сатирата и карикатурата „Јас, Итар Пејо“-Битола за 2017 година ќе биде објавен наскоро, за што Исток прес ќе информира дополнително.
